Cun agid da l'audiopedagogia emprendan ils uffants dad ir enturn uschè bain sco pussaivel cun lur situaziun individuala e da nizzegiar las resursas disponiblas.
La finamira dal sustegn è da gidar ils uffants a cuntanscher il pli aut grad d'autonomia pussaivel, da pussibilitar la participaziun sociala sco era l'integraziun en scola e da promover la sanadad psichica dals uffants e giuvenils.
Cun integrar ils geniturs/las persunas responsablas per l'educaziun e las persunas spezialisadas èsi pussaivel da sustegnair e concepir il svilup e l'integraziun en scola cun soluziuns individualas.
Il sustegn audiopedagogic vegn offert tut tenor basegn en furma da promoziun regulara e/u da cussegliaziun. Era la collavuraziun cun auters champs spezialisads fa part da noss'activitad.
Purschida
Scleriment
- nus faschain in scleriment audiopedagogic
- nus sclerin a moda cumplessiva il basegn da sustegn en tut ils secturs pertutgads da l'impediment d'udida, tegnend quint da la furmaziun bilinguala.
Promoziun
- nus promovain a moda sistematica l'attenziun auditiva: tadlar – chapir – discurrer – communitgar
- nus sustegnain il svilup linguistic, cognitiv e social-emoziunal
- nus promovain in svilup linguistic adattà a la vegliadetgna ed in stgazi da pleds varià
- nus promovain la furmaziun bilinguala (lingua orala e lingua da segns)
- nus introducin e mussain co duvrar ils agids cumpensatorics
Cussegliaziun, instrucziun e sustegn da las persunas pertutgadas e da lur ambient
- nus mussain co duvrar ils meds d'agid tecnics
- nus sensibilisain las persunas d'instrucziun e las classas da scola cun organisar occurrenzas d'infurmaziun/lecziuns d'empatia en scolinas e scolas
- nus accumpagnain ils uffants e giuvenils a l'entschatta da la scolina/scola u a chaschun da la midada da stgalim/scolaziun
- nus faschain lavur publica
- nus organisain perfecziunaments per las persunas d'instrucziun
Procedura d'annunzia
Annunziar in uffant u giuvenil pon ils geniturs/las persunas responsablas per l'educaziun sezs u – cun il consentiment da quels – era persunas spezialisadas dal sectur medicinal, psicologic u pedagogic:
al secretariat a Cuira 081 257 02 80
u al post regiunal correspundent
Il Servetsch Ortopedagogic dal Grischun lavura a basa d'in mandat da prestaziuns da l'Uffizi per la scola populara ed il sport. L'audiopedagogia è ina purschida facultativa e gratuita per ils geniturs/las persunas responsablas per l'educaziun. Tut las collavuraturas e tut ils collavuraturs suttastattan a l’obligaziun da discreziun ed a la lescha davart la protecziun da datas tenor LPD/OPDa.